Одржана Третата седница на Советот за соработка меѓу Владата и граѓанското општество

На 18.6.2025 година, Советот за соработка меѓу Владата и граѓанското општество ја одржа Третата седница, со која претседаваше претседателката на Советот, Никица Кусиникова. На седницата Советот утврди позитивно мислење по Предлог-Стратегијата на Владата за соработка со и развој на граѓанското општество, со Акциски план 2025-2028. Според мислење на Советот, усвојувањето на овој стратешки документ ќе придонесе кон унапредување на правната рамка за дејствување на граѓанските организации и механизмите за соработка и структурирано учество во процесите на креирање и следење на јавните политики, како и кон подобрување на финансиската одржливост на граѓанските организации и околината во која се развива граѓанското општество. Советот ќе го следи спроведувањето на Стратегијата и ќе се залага планираните мерки и активности да се спроведат во консултации и соработка со граѓанските организации. Согласно заклучоците на Работната група за изработка на измени на Деловникот за работа на Советот за соработка меѓу Владата и граѓанското општество, Советот ги утврди следните прашања што треба да се уредат со Деловникот:

- Правно-техничко усогласување на Деловникот со Одлуката за изменување и дополнување на Одлуката за формирање на Совет за соработка меѓу Владата и граѓанското општество (број на членови, називи на министерства и сл.);

- Исти права и обврски на замениците членови со членовите на Советот во случај на нивно отсуство или спреченост за работа (гласање, предлагање теми за дискусија и сл.);

- Информирање и консултирање на граѓанските организации (да се разгледаат Плановите за комуникација на кандидатите од Јавниот повик за избор на членови на Советот);

- Начин на работа / алатки за делување на Советот (мислења до Владата и органите на државна управа, информации за актуелни состојби за разгледување на седница на Владата, извештај за работа на Советот и сл.);

- Избор на претставници на граѓански организации во советодавни и работни тела;

- Електронско гласање и др.

Врз основа на пристигнатите пријави по Јавниот повик за учество на еден претставник на граѓанското општество во Секторската комисија за уметност, бр.33-11/1 објавен на www.nvosorabotka.gov.mk на 13.5.2025 година, Советот ја номинира д-р Јана Манева Чупоска од ДЛУМ-Друштво на ликовни уметници на Македонија, за член во Секторската комисија за уметност.